عصبني الاشتراكي! و طمني الختيار

والله بالي طويل و مابعصب , و فعلاً خلال السنة الماضية بالرغم من الظروف القذرة عصبت مرتين بس .. اليوم عصبت , يمكن لأول مرة بعصب بهالشكل , مع شخص صيني كان يدافع عن نظام الأسد! شخص هرب من الصين بالعام 1989 لانو كان من المتظاهرين ضد النظام الصيني و حالياً عم يدافع عن الأسد خوفاً من ضياع ما يسمى ( السلم الاجتماعي) بحسب رأيو , لما يكون النظام عسكري , فالشرطة بكل محل , و الامن بكل محل , و بامكان الاطفال يلعبوا بالشارع!
غريبة انو بنفس الوقت لما كان هاد عم يدافع عن السلم الاجتماعي!!! الي حاميه الاسد , كان الأسد عم يدفع شبيحته للقيام بمجزرة تدل على انو السلم الأجتماعي التعن ابو ابوه بسبب النظام..
كان يدافع عن الأسد لان فيه نظام ضمان صحي ( اشتراكي ) , بينما بالمقابل عم يقلي! انا كمواطن سويسري لازم ادفع 400 فرنك بالشهر ضمان صحي!!! عم يحكيني عن ضمان صحي بنتمتع فيه , بينما مسكين مابيعرف انو المجرمين من كل الالوان و الاشكال بيشتغلوا بالمشافي الحكومية.
ختم حديثه عم يقول لرفيقته البولندية الي كانت تشاركوا نوعاً ما بالرأي , انو هاد بعدو ( صغير ) , قلتلو انا صغير بس انت جبان! انت هربت من الثورة الي آمنت فيها قبل 20 سنة! انا ماني جبان , و هالصغار الي مو عاجبينك , كسرو الديكتاتور بمصر , و كسروه بتونس وفعسوه بليبيا و راح يطيروه بسوريا! بس انت جبان! و مانك إلا جبان عم تحمل فشلك على شماعات علقوا عليها فشلون كتير ناس…
خلصت الحديث المستفز و طلعت راجع للبيت , السائق ايرلندي كبير بالعمر, و المعروف عن المجتمع الايرلندي انو مجتمع متماسك عائلياً و بيشبه كتير المجتمع السوري , سألته , كيف انتصرتوا ع الانكليز ؟ قلي بالتكاتف الاجتماعي و التضامن .. قلتلو و اليوم , ايرلندا دولة آمنة كتير و ليكنا بدبلن و الامان بيبين بكل محل ليش؟ قلي بسبب تضامن المجتمع , قلتلو مانها الدولة و الشرطة الي عم توفرلكن الامان! قلي لا! وين الشرطة هلا؟ نايمين! بس اذا جاري تعب بساعدو اذا حسيت في خطر على احد بنزل بساعدو , اذا الحارة صار فيها مشاكل بننزل كلنا سوا..
بنحتاج التكاتف بهاللهحظة ياشباب , بنحتاج التضامن , في شي اكبر منا كلنا و اكبر من الانتماء و اكبر من اللغات و اكبر من القوميات و اكبر من اي شي , هو بلدنا 🙁
Share Button

One thought on “عصبني الاشتراكي! و طمني الختيار

  • Asmaa says:

    فعلا سبق وطرحت فكرة مشابهة ببداية الازمة .. انو الامن والأمان الشعب هو اللي مأمنو لبعضو ..
    مو النظام ولا شبيحتو
    والتمسك بالنظام بحجة الأمن والامان ..
    متل السجين اللي عم يتمسك بالسجان لانو عم يطعميه خبز يابس كل يوم ..
    واقصى طموح البهائم علفها ..

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.