الأقامة الأستونية الأفتراضية, تفاصيلها وتحدياتها

بهاد الفيديو, شرحت معلومات عن الأقامة الاستونية الافتراضية و فائدتها و كيفية تقديم الطلب عليها.

و هون عم جاوب على بعض الأسئلة الي وصلتني بخصوص الأقامة و تحدياتها.

الضرائب –

كيفية التسجيل –

اجراءات الاقامة و التسليم –

السفارات الأستونية المختصة في منطقة الشرق الأوسط –

اشياء لازم تاخدها بعين الاعتبار –

بخصوص الضرائب, الرابط (1) بيشرح موضوع الضرائب و طبعاً بنصحكم تستشيروا مختص قبل ما تخطوا اي خطوة و لكن بالمختصر, هي الأمثلة راح تساعدكون تفهموا نظام الضرائب الخاص بالاقامة الأفتراضية.
* مازن شخص مقيم في تركيا, و حابب ياخد الأقامة الأفتراضية, شغل مازن اونلاين و موجه لزبائن موجودين في الأمارات, مازن وقع عقد بقيمة 10 ألاف دولار و استلم المبلغ على حسابه لشركته الأستونية. من ضمن العقد, مازن اشترى معدات و اجهزة و برمجيات بقيمة 2000 دولار, و كمان دفع لشخص 2500 دولار لحتى يساعده. مازن مطلوب منه يدفع ضريبة تجارية لأستونية على هاد العقد, و الضريبة قيمتها 20% على الربح, يعني المطلوب منه انو يشيل الكلفة الي صرفها و الباقي هو الربح, بهالحالة راح يشيل مبلغ 4500 و يدفع ضريبة 6500 على الباقي ضريبة قيمتها 1300 دولار.
مازن مانو مطلوب منه يدفع ضريبة تجارية لتركيا لان الزبون مو بتركيا. مازن قرر يحول المبلغ 6500 دولار لحسابه في تركيا, بهالحالة, مازن لازم يراجع مختص ضرائب تركي و يتأكد منه في حال بيتوجب عليه يدفع ضريبة دخل من مورد اجنبي.
* رباب مقيمة في أمريكا, و وقعت عقد مع شركة بريطانية لحتى تنفد مهمة معينة, قيمة العقد 5000 دولار. رباب اضطرت انها تشتري رخصة لبرنامج خاص بالتصميم, كلفها 800 دولار و اشترت كتب بقيمة 200 دولار لحتى تتعلم ع البرنامج, بهالحالة, رباب راح تدفع ضريبة تجارية في استونيا على المبلغ 4000 الي هو صافي الربح, الضريبة راح تكون 800 دولار.
رباب حولت باقي المبلغ 3200 دولار, و بنهاية السنة, راح تدفع ضريبة دخل عليها كأنه اي دخل حصلته بأمريكا, و يمكن هي الضريبة تكون قيمتها 15% من مجمل ربحها.
*نسرين شخص مقيم في الأمارات, ووقعت عقد مع شركة أمريكية, و طبعاً العقد كان عن طريق شركتها في أستونيا. قيمة العقد كان 6000 دولار, و اشترت كاميرا جديدة لحتى تصور المطلوب منها بالعقد بقيمة 500 دولار. نسرين راح تدفع ضريبة تجارية لأستونيا بقيمة 20% من ربحها الصافي الي هو 5500 دولار, يعني المبلغ راح يكون 1100 دولار , و راح تحول الباقي لحسابها بدبي 4400 دولار. نسرين ما راح تدفع اي ضريبة دخل بالأمارات لان مافي ضريبة دخل بالأمارات.
 
* شيماء مهندسة عايشة بمصر و عم تأسس لـ Start up و مضطرة انها تشتري بيت كوين لحتى تشتغل على مشروعها بحكم انو البت كوين ممنوع في مصر. بنفس الوقت شيماء وقعت عقد مع شركة أمريكية لحتى تصمملهم موقع الكتروني عن طريق شركتها في استونيا, قيمة العقد كان 20000 دولار, تحول كامل المبلغ لحساب شركتها في استونيا. شيماء قررت تشتري بت كوينز بـ 10000 دولار و تترك 10000 دولار بحساب شركتها لحتى تستخدمها للتأسيس. شيماء ما راح تدفع اي ضريبة لأستونيا لان المبالغ المدورة و المستثمرة في الشركة ما عليها ضرائب, الضرائب فقط تحسب وقت السحب. بنفس الوقت البت كوين هي شكل من أشكال العملة, فعلياً, شيماء استبدلت عملة بعملة أخرى و هاد الموضوع ما عليه اي ضرائب, و لكن في حال ارتفع البت كوين و المبلغ الي ربحته شيماء من البت كوين كان 5000 دولار, و قررت شيماء تسحب 5000 دولار, وقتها راح تدفع 1000 دولار ضريبة تجارية على الربح الي قررت تسحبه فقط.
 
:كيفية التسجيل-
التسجيل كتير سهل, الرابط رقم (2) بياخدكون على الطلب الطلب بسيط و بيكلف الطلب مبلغ 100 يورو.
 
– اجراءات الاقامة و التسليم:
بعد تقديم الطلب, راح يوصلك تأكيد من شرطة أستونيا انهم استلموا طلبك, ممكن يبعتوا يطلبوا منك معلومات اكتر, انا طلبوا مني على سبيل المثال صورة اوضح. بعد استكمال المعلومات, الشرطة راح تعمل بحث عن الشخص, حتماً لحتى يتأكدوا انه مو ارهابي او شخص بيشتغل بغسيل الأموال بعدها في حال توافق على طلبك من الشرطة, راح يبعتوا الموافقة بالأميل و بعد 15 يوم راح تتصل معك السفارة الي اخترتها لتستلم طلبك انو وصلت الاقامة و لحتى يحددوا موعد الاستلام و البصمة معك.
 
– السفارات المختصة في منطقة الشرق الأوسط
بأمكانك البصم على الأقامة في القاهرة, انقرة, تل أبيب في منطقة الشرق الأوسط, الرابط (3) فيه خارطة كاملة.
 
– اشياء لازم تاخدها بعين الاعتبار
هاي الأقامة ماراح تساعد بالتهرب الضريبي نهائياً ولا حتى غسيل الأموال استونيا موقعة عقود تبادل معلومات ضريبية مع كتير دول و كمان العمليات المالية راح تكون مراقبة و بشدة.
هي الأقامة كتير مناسبة للأشخاص المقمين في تركيا, الأردن, لبنان, العراق, دول الخليج و مصر الخ, و لكن حتماً ماراح تفيد اي شخص عايش بأوربا او بأمريكا.
 
1- The Ultimate Guide to Estonian E-residency, Banking and Taxes https://medium.com/nomad-gate/estonian-e-residency-ultimate-guide-banking-taxes-cc27fe39c368
2- application for E-residency https://apply.gov.ee
3- Map , https://cdn-images-1.medium.com/max/1200/1*cru8QwKZu6-WVMV70wMYhw.png
Share Button

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.